ИЗВЕСТУВАЊЕ ЗА ЈАВНОСТА - Институт за социолошки и политичко-правни истражувања

ИЗВЕСТУВАЊЕ ЗА ЈАВНОСТА


 

 

Почитувани студенти, соработници и пријатели на ИСППИ,

Би сакале да Ве информираме дека на 21. Април 2017 год. од сеуште неразјаснети причини, настана пожар од големи размери, во кој делумно изгореа бараките во чии простории е сместен Институтот за социолошки и политичко – правни истражувања - УКИМ, додека од соседните бараки, освен пепел и изгорени сведоштва за сработеното, не остана трага.

По тричасовна борба со оганот, успешно беше спреченa поголема катастрофа, за што најзаслужни се пожарникарите, кои реагираа крајно професионално и успеаа да го изгаснат пожарот и да ги заштитат објектите и граѓаните од блиското окпружување. Ја користиме оваа прилика, јавно да им ја изразиме нашата благодарност!

Солидарност и поддршка покажаа и службите од ЈП Водовод и канализација – Скопје, кои на терен постојано ги снабдуваа пожарникарските возила со дотур на вода. А особено сме им благодарни и на директорот и заменик директорот и врабтените од соседното средно градежно училиште кои дури и активно се вклучија во гаснењето на пожарот. Исто така интервенираше и Полицијата. Им благодариме!

Храброст покажаа и соседите од блиските објекти, кои помогнаа во последен час да се евакуираат вработените во Институтот, за кои петокот започна како само еден вообичаен работен ден. Дента, само десетина минути пред опожарувањето, заврши јавна одбрана на магистерски труд поменаџмент на човечки ресурси, имаше паралелни работни состаноци на кои се планираа три значајни непосредни настани: научна среда во ИСППИ, презентација на заедничка меѓународна ЕРАЗМУС студиска програма по политички науки и финализирање на меѓународен научноистражувачки проект. Вработените во Институтот, внесени во својата работа, не беа ни свесни што се случува околу нив, сé додека не слушнаа пукотници, придружени со црн чад. Глетката беше страотна, чувството поразително, а вработените со солзи во очите гледаа како гори бараката која за нив е  „втор дом“.

Нашите сегашни и поранешни студенти, како и соработници, загрижени се јавуваа, а некои од нив и лично дојдоа, не можејќи да поверуваат во веста што ја беа слушнале од медиумите, како и да проверат дали има повредени. Речиси сите несебично ја понудија својата помош што особено не прави благодарни, но и горди што имаме вакви пријатели околу нас.

За среќа, поголемиот дел од Институтот е неоштетен, односно зачувани се библиотеката, архивата, проектната документација, како и досиејата на вработените и студентите.

Но, за жал, две предавални се целосно изгорени, заедно со техничката опрема и канцеларискиот мебел, со што во моментот е отежната нашата наставно-образовна дејност. Сепак, во моментот, со поддршка од Ректоратот на УКИМ, се врши првична санација на објектот, електричната инсталација и серверот, па се надеваме дека во скоро време повторно ќе ги имаме соодветни работни услови.  

Институтот веќе 52 години опстојува и успешно ги надминува проблемите и предизвиците со коишто се соочува низ годините, при тоа, во континуитет збогатувајќи ја науката и литературата, и развивајќи нови генерации на високо образовани кадри, со што директно придонесува за развој на македонското општество, во сите сфери.

Така и овој пат, ветуваме дека овој настан нема да не обесхрабри во реализацијата на нашите планови, идеи и програми, напротив, ветуваме дека со истиот ентузијазам и со уште поголема мотивација ќе продоложиме да работиме и да ги исполнуваме нашата мисија и визија, поради кои и постоиме.

Привремено ќе бидеме сместени во Педагошкиот факултет, во просторија бр. 4.