На 22 јануари 2025 година се одржа Презентацијата на првични наоди од Компаративното истражување на изборните системи/КИИС (Comparative Study of Electoral Systems/CSES) во Република Северна Македонија. КИИС е меѓународно анкетно истражување кое се фокусира на изборното однесување на граѓаните и се спроведува во 60 земји ширум светот во периодот по оддржување на изборите, од 1996-тата година. Истражувањето е за прв пат спроведено во земјата, на репрезентативен примерок од 1056 испитаници и се однесува на изборното однесување во врска со претседателските и парламентарните избори од април и мај 2024 година.
На настанот говореа проф. д-р Анета Цекиќ и доц. д-р Јован Близнаковски кои претставија дел од националните наоди на истражувањето, поврзани со излезноста и гласачките одлуки, начинот на формирањето на гласачкиот избор, учеството на граѓаните во активностите од изборната кампања, врските меѓу партиите и граѓаните и идеолошките преференци на граѓаните. Дискусијата беше модерирана од проф. д-р Ненад Марковиќ. Поздравни обраќања имаа проф. д-р Бојана Наумовска, директорка на ИСППИ-УКИМ, Марко Трошановски, претседател на ИДСЦС и Јоана Косма, директорка на ИФЕС за Северна Македонија.
КИИС во Северна Македонија е имплементирано од страна на Институтот за социолошки и политичко-правни истражувања при Универзитетот „Св. Кирил и Методиј“ во Скопје, во партнерство со Институтот за демократија „Социетас цивилис“ и Швајцарската програма за поддршка на изборите, спроведувана од од Меѓународната фондација за изборни системи (ИФЕС).