Иако живееме во 21 век, во ерата на човекови права и слободи, македонското прашање е сè уште предмет на жестоки политички дискусии, особено во рамките на Европската Унија. Имено, посебноста на македонскиот јазик и политичката легитимност на македонската нација се неретко оспорувани и негирани од страна на одредени политички елити на некои земји-членки на ЕУ, како и од дел од нивните академски заедници.
Негирањето на посебноста на македонскиот јазик и оспорувањето на политичката легитимност на македонската нација би можело да се категоризира како форма на политички говор на омраза и тоа од следните причини:
- Непочитување на правото на самоопределување;
- Културна маргинализација;
- Прекршување на човековите права и слободи;
- Барања за историски ревизионизам;
- Поттикнување на непријателство и предрасуди;
- Создавање на политичка траума на ниво на индивидуи и заедница;
- Поткопување на довербата во институциите на ЕУ.
Научноистражувачкиот проект „Негирањето на посебноста на македонскиот јазик и политичката легитимност на македонската нација како форма на политички говор на омраза“ има цел да ја реафирмира посебноста на македонскиот јазик и политичката легитимност на македонската нација. Истовремено, преку ова истражување треба да се утврди дека негирањето на посебноста на македонскиот јазик и оспорувањето на политичката легитимност на македонската нација претставува форма на политички говор на омраза. Истражувањето се стреми да даде релевантно гледиште на актуелните состојби и да поттикне понатамошни анализи и согледувања на оваа тема со цел обезбедување на поголем број информации од научниот свет. Исто така, ова истражување проблемот го разгледува од повеќе аспекти: политиколошки, социолошки, психолошки, комуниколошки, правен и лингвистички, односно неговиот пристап е сеопфатен во поглед на истражуваниот феномен.
Проектот „Негирањето на посебноста на македонскиот јазик и политичката легитимност на македонската нација како форма на политички говор на омраза“ се реализира од страна на истражувачки тим на Институтот за социолошки и политичко-правни истражувања (ИСППИ) во соработка со Истражувачкиот центар за ареална лингвистика „Божидар Видоески“ (ИЦАЛ) при Македонската академија на науките и уметностите (МАНУ), во периодот од 2023 до 2025 година. За таа цел, беше потпишан Меморандум за соработка помеѓу ИСППИ и ИЦАЛ.
Членови на истражувачкиот тим од ИСППИ:
- Проф. д-р Ганка Цветанова (раководител на научноистражувачкиот проект)
- Проф. д-р Елеонора Серафимовска
- Проф. д-р. Маријана Марковиќ
- Доц. д-р Милка Димитровска
- Асс. м-р Теа Конеска-Василевска (секретар на научноистражувачкиот проект)